Puwede na muling mangarap - Kontraktuwalisasyon, mananatili ba sa ating bansa? Sa isang katulad ko na ama, may mga anak na tapos na sa pag-aaral at mayroon nang mga apo ay naghahangad pa bang mangarap na alisin na ang kontraktuwalisasyon sa ating bansa? Kung ikaw ay isa lang ordinaryo at walang pakialam sa mundo ay sasabihin mo na, e ano ba kong kontraktor sila, basta ako regular na nagtratrabaho sa aking kumpanya at sumasahod ng maayos ay wala akong pakialam! Pero ako, bilang isang nagmamahal sa mga kababayan ay nangangarap pa din na alisin na ang mga kontraktor sa pagtratrabaho at gawin ng lahat ay regular!
Kanina sa pakikinig ko ng radyo ay may balita akong narinig tungkol sa pagka-koryente ng isang lineman ng telepono at isang pag-aabandona ng mga Piloto ng kanilang trabaho sa Philippine Airlines, na pati ang mga flight steward ay mukhang iaabandona na ang kanilang trabaho dahil sa kontraktor lang sila at pag walang piloto wala din silang trabaho!
Hindi ko dapat pakialaman ang pangalawa dahil wala akong alam sa negosyo ng Philippine Airlines, pero ang una ay papakialaman ko dahil dito sa trabahong ito ko pinalaki ang mga anak ko at pinagtapos ng pag-aaral. At malaki ang naging hirap naming mga empleyado noon para palakihin ang kumpanyang aking pinagtrabahuhan, at malaki ang pangarap ko na maalis ang kontraktuwalisasyon sa kumpanyang ito, dapat wala na akong pakialam pero hindi ko matiis na ito ay bumagsak na lang at malugi, malaki ang utang na loob ko sa kumpanyang ito!
Hindi ko pa alam ang puno't dulo ng narinig kong balita, pero isa lang ang masasabi ko, ito ay "Little learning is dangerous', malaki ang sapantaha ko na ito ay kontraktor lamang dahil kung siya ay empleyado, alam niya ang gagawin para huwag siyang makoryente, simple lang, bababa ng poste kung umuulan, o magsuot ng mga safety globes kung basa ang poste, di man niya magawa sa oras na iyon ang telepono walang problema dahil suwelduhan naman siya. Pag kontraktor ka, by hook or by crook kailangan mo iyon gawin kahit na nasa panganib buhay mo!
Sa panahon ng tag-ulan ay dapat maging maingat sa pag-akyat ng poste, isipin laging may naka-amba sa iyong panganib, hindi man koryente ay maaring madulas ka at mahulog, o kaya may nakaabang sa iyong ahas sa itaas dahil yan ang pangkaraniwan nilang puntahan kung mga panahon ng mga baha. Ang mga kontraktor sa pag-gawa ng telepono ay halos walang training, kaya nagtatagal ang mga sira ng telepono sa ngayon o kung may training man ay kulang, puro actual lang tinuturo ay baka hindi man lang nila alam kung paano ang teorya ng telepono, kung paano ito umaandar, sayang ang kumpanya sa ganitong mga nagtratrabaho, malapit na itong bumagsak, sino ang may problema, di ba ang kumpanya din?
Pakiusap ko sana sa mga namumuhunan, kung "Pilipino" kayo huwag na kayong kumuha ng mga kontraktor, gawing ninyong regular ang kanilang mga trabaho, bigyan ng benepisyong maganda, at bigyan nang mga pagsasanay o training para alam nila ang mga gagawin nila sa oras ng panganib o mga paraan para umiwas dito, buhay din yan na ginawa ng ating Diyos, na nasayang dahil sa kasuwapangan sa pera ng mga namumuhunan, liban na lang kung dummy lang kayo na pinuhunanan ng ibang bansa, pakiusap lang po, kung malaki naman ang kinikita, huwag ng kumuha ng kontraktor!
Dahil alam ninyo ba, na kung kontraktor lang ang mga gagawa ng mga teknikal na trabaho ay wala silang interes na umunlad ang inyong kumpanya, walang malasakit ika nga, na siyang kailangan-kailangan ng isang kumpanya, ang "malasakit", magisip po sana kayo....
Walang komento:
Mag-post ng isang Komento